قاعد فى بيتى لا ليا ولا عليا فاذا بى وحلوة فاذا بى دى ...الاقى نفسي معزوم فى الاحتفال باليوبيل الفضى لمستشفى مبرة العصافرة من غير سبب كدة كان الاحتفال فى هيلتون جرين بلازا قلت والله اروح اعرف حكاية العزومة دى مع ان كان ورايا مزاكرة كتيرة والله بس اهو يوم مش حياثر ماحنا ضيعنا كتير يعنى
رحت فعلا هناك فى تمام العاشرة مساءا وكنت داخل معايا الدعوة فى ايدى لاقيت رئيس مجلس الادراة واقف على الباب بيستقبل كبار الزوار امثالى طبعا
وانا داخل بعرفة بنفسي لاقيتة بيقولى اهلا اهلا ازى حضرتك يا فندم(ميعرفش اللى فيها بقى) وعرفنى على مراتة واولادة (حاجة غريبة) يمكن عاوز يناسبنى ماعلينا قلتلة دة شرف كبير انى احضر النهاردة والله وربنا يوفقكم وكلام حلو من دة ومراتة كانت فرحانة انى جيت على الرغم ان دى اول مرة اشوفها اصلا واول مرة اعرفهم كمان بس انا مش عارف الدعوة دى موجه ليا لية انابالظبط
المهم دخلت لاقيت راجل شيك كدة اخدنى بالدعوة وراح يقعدنى فى مكانى لاقيت نفسي قاعد جنب الدكاترة بتوعى فى الجامعه وكان معايا فى نفس الصف نقيب اطباء مصر حمدى السيد ووكيل وزارة الصحة فى اسكندرية قلت اوبة العملية دخلت فى الجد بقى سلمت على الدكاترة واتعرفت عليهم فى سابقة من الثقة لم اعهدها فى نفسي من قبل..... قعدت فى مكانى وبدات الحفلة
بدات بالقران الكريم وكلمة رئيس مجلس الادراة اللى عرفت بالصدفة ان فكرة المستشفى كانت فى الاول عبارة عن شقة 70 متر فى العصافرة الى انت تطورت لدلوقتى وكنات عبارة عن فكرة دكاترة نواب فى الكلية قالوا نعمل مشروع بسيط مع بعضهم ياكلوا منة عيش بس العيش طلع (بيتى بان) تخلل الحفلة فقرة غنائية فى حضور الفنان على الحجار وبصراحة صوتة فى الحقيقة تحفة!!!! وطبعا انا مش ححكى على الاوبن بوفية عشان الناس ميحصلهاش حاجة وهى بتقرا انا مش ناقص اعمل بلبلة هن انا مش حقول ان كان فى جمبرى فاميلى سايز وسيمون فيمية وحاجات خفيفة تانية
واخيرا الحفلة خلصت الساعه 1 وكان يوم تحفة بجد
ولغاية دلوقتى انا مش عارف انا معزوم لية بصراحة؟؟ لو حد عرف يبقى يقولى يمكن انا بقيت شخصية مشهورة ولا حاجة الله اعلم وجارى البحث عن جواب.......والسلام ختام